إزاي حمو المرشدي بقى نجم جيل زد في 2026؟

في 2026، أغاني حمو المرشدي كانت حاضرة في تريندات كتير، من كأس العالم، لرقصات تيك توك، لحد الأفراح.

وده مش مجرد إحساس، لأن بحسب بيان نشرته Spotify، جيل زد هما الجمهور الأكبر لأغاني حمو المرشدي، وبيمثلوا أكتر من 85% من إجمالي استماعاته في مصر.

وخلال آخر 28 يوم بس، أكتر من 2.6 مليون مستمع في مصر سمعوا أغانيه، بزيادة 30% مقارنة بـ3 شهور فاتوا. كمان، استماعات أغانيه في سبتمبر 2026 زادت بنسبة 120% مقارنة بنفس الشهر في 2025.

حمو المرشدي بدأ مشواره الفني في 2024 بأسلوب أقرب للمهرجانات التقليدية، لكن مع 2026، أسلوبه الموسيقي بيتغير، وبيمزج بين المهرجانات والراب الميلوديك والإلكترو شعبي، وده بيبان في أغاني زي "انت مش حمو". والنجاح ده اتكرر في أغاني تانية كتير، زي:

1- "الولا حمو جه":

نزلت في 19 مايو اللي فات، وكانت ضمن قائمة أبرز أغاني صيف 2026 على Spotify مصر. ونسبة استماعاتها الشهرية زادت بأكتر من 2,700% بين مايو ويوليو 2026.

2- "أنا 5 ستار على كوكبي":

نزلت في 11 فبراير 2026، وحققت 13 مليون استماع على Spotify، وبين فبراير ومايو بس، ارتفعت استماعاتها الشهرية بنسبة 1,900%.

3- "عيال جديدة لانج":

نزلت يوم 17 يونيو، وحققت 8 ملايين استماع على Spotify، ومن وقت نزولها لحد شهر أغسطس، ارتفعت استماعاتها الشهرية بأكتر من 845%.

4- "هاي معاكو حمو":

نزلت في 21 أبريل اللي فات، وحققت 3 ملايين استماع على Spotify، وما بين أبريل ومايو، ارتفعت استماعاتها بأكتر من 700%.

5- "عشان بحبك":

نزلت يوم 8 سبتمبر، وجمعت حمو المرشدي مع الملحن عمرو مصطفى والمنتج وزة منتصر، وحققت أسرع انطلاقة بين أغاني حمو لحد دلوقتي، بعد ما سجلت حوالي 2.5 مليون استماع في أول 23 يوم من طرحها. ووصل إجمالي استماعاتها على Spotify لأكتر من 4 ملايين استماع لحد دلوقتي.

شعبية حمو المرشدي مش مقتصرة على الجمهور المصري بس، فخلال آخر 3 شهور، عدد الناس اللي بيسمعوا أغانيه من بره مصر زاد بنسبة 110%، وكمان إجمالي مرات تشغيل أغانيه خارج مصر زاد بنسبة 160% خلال نفس الفترة. قولنا أنت بقى بتسمع إيه لحمو المرشدي؟