إتاحة موسوعة المسرح المصري المصورة للدكتور عمرو دوارة

موسوعة "المسرح المصري المصورة" هي واحدة من أكبر وأهم مشروعات المسرح المصري، فالدكتور عمرو دوارة اشتغل على إعدادها مع فريق عمله لمدة 25 سنة، وهي عبارة عن 17 جزء بيوثقوا كل حاجة عن المسرح المصري وعروضه الاحترافية اللي تم إنتاجها من سنة 1870 لحد دلوقتي، فالموسوعة بتوثق أكتر من 7 آلاف عرض مسرحي، وهي متاحة للباحثين والدارسين ولكل المهتمين بفن المسرح.

والموسوعة بتضم كل البيانات الخاصة بكل عرض، من اسم العرض، والفرقة المنتجة، وتاريخ الإنتاج، وأسماء المشاركين في تقديمه (المؤلف/ المخرج/ مصمم الديكور/ الملحن أو المؤلف الموسيقي/ مجموعة الممثلين)، و3 صور فوتوغرافية لكل عرض، وفي حالة صعوبة وجود صور فوتوغرافية بيتم الاستعانة بأغلفة بعض المسرحيات أو الأفيشات الخاصة ببعض العروض وملصقات الدعاية أو الاستعانة بالصور الشخصية للنجوم الأربعة المشاركين في بطولة العرض، أو الاستعانة بالصور السينمائية اللي سجلت ملامح وأعمال بعض نجوم المسرح.

واللي بيميز الموسوعة أكتر هو توثيقها لعروض لأول مرة زي "مسارح الصالات" في منتصف الثلاثينيات والأربعينيات من القرن الماضي اللي قدمت أكتر من 350 عرض مسرحي، وشارك في تقديمها الكتاب كبار زي بيرم التونسي، أمين صدقي، بديع خيري، أبو السعود الإبياري، وأخرجها كبار المخرجين زي عزيز عيد، وبشارة واكيم، وعبد العزيز خليل، وشارك بالتمثيل فيها علي الكسار، وفاطمة رشدي، وبديعة مصابني، وفتحية أحمد، ورتيبة وأنصاف رشدي، وببا عز الدين، وفهمي آمان، وعبد الحليم القلعاوي، وإسماعيل ياسين، وتحية كاريوكا.

وده غير توثيق الموسوعة "للمسرحيات المصورة" أو المعلبة، والمقصود بيها العروض اللي تم إنتاجها مخصوص للتصوير التلفزيوني ، والموسوعة ضمت كمان عروض بعض الفرق المجهولة اللي أسسها بعض النجوم وقدمت عرض واحد أو 3 عروض بس، زي فرق: حسن البارودي، وحسن فايق، ومحمد كامل المصري (شرفنطح)، ونجمة إبراهيم، ونيللي مظلوم، وفريد شوقي، وبدر الدين جمجوم، وكمال الشناوي، وحسن يوسف، وليلى طاهر.

أما بقى عن آخر جزء من الموسوعة وهو الجزء الـ 17 فبيحكي عن مجموعة المكانز والفهارس بحيث الباحث يقدر يعرف المعلومات الخاصة لكل عرض سواء عن طريق اسم الفرقة، أو سنة الإنتاج، أو اسم الفرقة، أو اسم كل مبدع (سجل المؤلفين، المخرجين، مهندسي الديكور، الملحنين).