المترو لغى "النص تذكرة" للعسكريين وأفراد الشرطة والصحفيين

قال أحمد عبد الهادى المتحدث الرسمى باسم الشركة المصرية لإدارة وتشغيل مترو الأنفاق، إن مجلس إدارة الشركة وافق على إلغاء الخصومات الممنوحة لبعض الفئات على تذاكر المترو، واللي كانت مقدرة بـ "جنيه" للعسكريين والشرطة والصحفيين، وقال إن التذكرة المخصصة ليهم اللي كانت بـ 2 جنيه، هتبقى بـ 3 جنيه، والتذكرة اللي كانت بـ 4 جنيه، هتكون بـ 5 جنيه، والتذكرة بـ 6 جنيه هتكون بـ 7 جنيه، والقرار هيتم تطبيقه من النهاردة، الإتنين 10 سبتمبر.

"عبد الهادي" وضح إن الاشتراكات المخفضة للفئات المذكورة هتفضل زي ما هي ومش هتتغير، وإن تذاكر المترو الخاصة بذوي الاحتياجات الخاصة مش هتتغير، وقيمتها 50 قرش للتذكرة على كل الخطوط، وكذلك اشتراكات الطلبة مش هتتغير.