بعروض فنية مجانية.. مهرجان "ليلة رقص معاصر" من 29 أبريل لـ 9 مايو

السنة دي العروض مش بس هتكون على المسارح، لكن كمان في مساحات مفتوحة داخل المدن، عشان يوصل لناس أكتر ويقدم الرقص المعاصر بشكل غير تقليدي.

البرنامج مقسوم لـ4 محاور:

أولهم «كيميت» للعروض الاحترافية اللي اتقدمت قبل كده، وكمان برنامج الإقامات الفنية اللي بيجمع فنانين من مصر وخارجها يشتغلوا مع راقصين مصريين على عروض جديدة لمدة شهر.

وكمان ندوات بتناقش تحديات المجال، وبرنامج «خطوة أولى» لدعم المواهب الجديدة وإتاحة فرصة ليهم يعرضوا شغلهم.

العروض في القاهرة هتكون في المسرح القومي ومكتبة القاهرة الكبرى ومسرح السامر، وفي مساحات مفتوحة بوسط البلد زي ساحة سينما راديو، أما عروض الإقامات الفنية فهتكون في الإسكندرية بالتعاون مع مكتبة الإسكندرية، وكمان في المنيا للسنة التانية على التوالي.

"ليلة رقص معاصر" هي مبادرة مستقلة بدأت في القاهرة من 11 سنة، بهدف تقديم تجربة فنية مخصصة للرقص المعاصر، عن طريق مزيج من العروض اللي صمّمها فنانين رقص من مصر وعدد من الدول، زي فرنسا وبريطانيا والسويد وهولندا وإسبانيا.

ولأول مرة الفعاليات هتكون تحت رعاية وزارة الثقافة المصرية وبشراكة استراتيجية مع المركز القومي للمسرح والموسيقى والفنون الشعبية ضمن مشروع الأرشيف الوطني لقاعدة بيانات ودعم الفرق والمهرجانات المستقلة، وبدعم من اتحاد المعاهد الثقافية الأوروبية «يونيك» وبتمويل من الاتحاد الأوروبي.