دبي عملت أول طيارة بدون طيار لإنقاذ الغرقى

بلدية دبي أطلقت طيارة إنقاذ بدون طيار هي الأولى من نوعها في العالم من حيث التصميم والاستخدام. طيارة الإنقاذ دي هدفها تنقذ أي حالات غرق فردي أو جماعي، عن طريق إنها بتطير تدخل جوه المياه بسرعة وترمي عوامات إنقاذ للشخص أو الأشخص اللي بيغرقوا، لحين وصول المنقذ البشري.

المهندسة علياء الهرمودي مدير إدارة البيئة، قالت إن الطيارة بتنقل 4 أطواق إنقاذ للغرقى في البحر، ودول يقدروا ينقذوا 8 غرقى في وقت واحد. المنقذ الطائر ده أحداث اختراع من منظومة الإنقاذ والسلامة الشاطئية في بلدية دبي، والمنظومة دي قدرت تنقذ 2139 حالة، منها 330 حالة غرق جماعي، من وقت افتتاحها في 2016.

طيارة "المنقذ الطائر بتتكون من مروحة مزدوجة مثبتة على 4 أذرع قابلة للطي، تقدر تشيل حمولة لغاية 8 كيلو، والطيارة ممكن تتحكم بيها عن بعد، سواء يدويًا أو تحديد مسار معين للطيارة وبعدين تسيبها هي هتروح للمكان اللي أنت حددته أوتوماتيك. الطيارة كمان فيها كاميرتين ونظام متكامل لمخاطبة الجمهور وإيصال الإرشادات الصوتية للجمهور عن بعد.

مدة الطيران اللي بتسمح بيها بطارية الطيارة هي 30 دقيقة كاملة، بعدها تتشحن البطارية، والمدة دي هتسمح للطيارة إنها تعمل أكتر من رحلة إنقاذ قبل ما تحتاج تتشحن تاني.