ترميم كوبري "إيفل" المعلق في حديقة الحيوان

وزير الزراعة زار حديقة الحيوان برفقة السفير الفرنسي بالقاهرة ستيفان روماتيه وشافوا الكوبري المعلق داخل الحديقة واللي صممه  وأشرف على تنفيذه المهندس اللي صمم برج "إيفل" الفرنسى الشهير جوستاف إيفل من أكتر من 120 سنة، وتم الاتفاق إن فرنسا تدعم مصر عشان يطوروا ويعيدوا تأهيل الكوبري عشان يكون أحد المزارات الهامة في الحديقة. 

الكوبري هو أقدم كوبري مُعلق في مصر وأفريقيا والشرق الوسط، وبدأ تصميمه في 1875 لما كلف الخديوي إسماعيل المهندس جوستاف إيفل بإنشائه ونفذته شركته «إيفل أى سيو» بين عامي 1875م، و1879م، يعني قبل ما يعمل برج إيفل بـ10 سنين.

الكوبري كان جزء من حديقة إسماعيل باشا، وتم بناء الكوبري فيها قبل ما يتم تخصيص جزء منها لحديقة الحيوان، والكوبري معلق على جبلين في الحديقة عشان يكون في أعلى نقطة فيها، وفي أول الكوبري فيه شعار الخديوي إسماعيل المكون من حرفي "IP"، وتزينه ثلاث نجوم وأسفله هلال ونجمة ويعلوه التاج الملكي.