حسن شاكوش وعمر كمال اعتذروا للجمهور وغيروا كلمات مهرجان "بنت الجيران"

مهرجان "بنت الجيران" أنجح مهرجان الناس سمعته من سنين، الموضوع وصل إنه بقى التاني على Sound cloud على مستوى العالم، ومشاهداته على اليوتيوب وصلت لـ97 مليون، وفجأة حسن شاكوش وعمر كمال بقوا نجوم مش مغضوب عليهم عشان نجاح المهرجان أكبر من إن حد يمنعه.

حسن شاكوش اتقدم لامتحان نقابة الموسيقين ووفقًا لتصريحات هاني شاكر إنه اتقبل، بس النقيب كان معترض على جملة في المهرجان و"شاكوش" وعده بتغييرها، لكن رغم ده ظهر شاكوش وعمر كمال في ستاد القاهرة وهما بيغنوا المهرجان كامل وبيقولوا "هشرب خمور وحشيش" الأمر اللي خلى الرياضيين والإعلاميين يعترضوا ويقولوا إزاي الكلمات دي تتغنى في الستاد. 

عمر كمال وحسن شاكوش كان بينهم خلاف اتوسط في حله تامر حسني اللي نصحهم يغيروا الجملة ويخلوها "من غيرك مش هقدر اعيش" وتم تغيير الجملة فعلًا وحذف النسخة الأولى من المهرجان على ساوند كلاود ونزلوا فيديو اعتذار للجماهير.