"صوت مصر" تجربة بصرية بتحكي قصة أم كلثوم هتبدأ في قصر عائشة فهمي
المعرض يوم 18 أغسطس
السنة اللي فاتت احتفلنا بمرور 100 سنة على بداية موهبة أم كلثوم، واستمتاعنا بإبداع مميز وصوت مصري لسه لحد دلوقتي بيعبر عننا ولما بنسمعه بنفتكر ذكريات وبنتخيل شكل حياتنا بيه. وفي تجربة بصرية توثيقية مختلفة هيتم افتتاح معرض "صوت مصر" في قصر عائشة فهمي يوم الأثنين 18 أغسطس 2025، واللي هياخدنا في رحلة من خلال صفحات الجرايد القديمة ومقتنيات أم كلثوم الأصلية عشان نرجع لزمن صوت أم كلثوم. الدكتور وليد قانوش، رئيس قطاع الفنون التشكيلية، قال إن المعرض استغرق وقت طويل لتجهيزه وإنه بيشمل أعمال كل الفنانين اللي اتناولوا حياة أم كلثوم مع جزء من مقتنياتها الموجودة بمتحفها في المنيل. المعرض كمان هيكون فرصة لزيارة قصر عائشة فهمي وهو قصر كلاسيكي اتبنى سنة 1907 على إيد المصمم الإيطالي أنطونيو لاشاك، وهو قصر تاريخي من دورين في منطقة الزمالك بيضم كتير من اللوحات والتماثيل والتحف المعروضة للجمهور، وتم ضمه لهيئة الفنون والآداب وقطاع الفنون التشكيلية سنة 1975، وهيتم إحياء سيرة أم كلثوم في المكان اللي بيجمع بين التاريخ والفن تقديرًا لسيرتها وإرثها الفني.
- الموضوع اللي فات تحويل 2 مليون شريط إذاعي وتليفزيوني لوسائط رقمية
