"عمرو.. حيث هناك وحده" رواية تأليف إبراهيم عيسى عن مسيرة عمرو دياب

الرواية بتقدم تاريخ مصر من خلال رحلة عمرو دياب، من أول نشأته في بورسعيد خلال عهد عبد الناصر، مرورًا بمرحلة التهجير بعد حرب 67، وشبابه في عصر السادات ومبارك، وفترة غناه في شارع الهرم في التمانينات، وبعدين التسعينات والألفينات لحد ما بقى أيقونة عربية عالمية.

وده بجانب عرض التطور الموسيقي اللي عمله عمرو دياب وتأثيره في المشهد المصري والعربي، وده احتاج بحث كبير.

وبحسب تصريحات للقاهرة 24، فالمخرج طارق العريان أعلن عن إخراجه لمسلسل جديد يجسّد فيه عمرو دياب قصة حياته، وهتكون من كتابة إبراهيم عيسى.  

إبراهيم عيسى قال إنه اشتغل على الرواية بعد ما سجّل أكتر من 16 ساعة حوار مع الهضبة، حكى فيها عن طفولته ونشأته ورحلته في الفن بكل صراحة. وأكد إن تجربة عمرو دياب تجربة أسطورية، وتستحق رواية تعرض تفاصيلها.

وأضاف "عيسى" إن المشروع بدأ كفكرة مسلسل، لكن عمرو دياب اقترح إن البداية تبقى رواية أدبية تبقى الأساس الفني للعمل، وقال "عيسى" إن ده بيعكس تقدير الهضبة لقيمة النص.

"عيسى" وضح كمان إن دي أول رواية عربية أدبية في التاريخ توثق حياة فنان، لأن كل اللي اتكتب قبل كده عن الفنانين كان أقرب للمذكرات وللكتابة الصحفية، لكن "عمرو.. حيث هناك وحده" عمل روائي كامل بشخصياته وأحداثه وتاريخه.

وقال "عيسى" إن التسجيلات مع عمرو كشفت تفاصيل إنسانية وفكرية جديدة بتوضح عمق شخصيته وبتفسر هو ناجح ومستمر لحد دلوقتي.