"كلموهم عن الطماطم" حملة من Safe Egypt للتوعية بأهمية الثقافة الجنسية

وده بعد ما فريق مؤسسة Safe Egypt لاحظ وجود فجوة واضحة في طريقة تعامل الأهالي مع أسئلة الأطفال الطبيعية، زي: "البيبي بييجي منين؟" أو "ليه شكل جسمنا كده؟"، الأسئلة اللي بتتقابل أحيانًا بالصمت أو الرفض أو جمل زي "عيب" و"إنت لسه صغير"، وده ممكن يشجع الأطفال تدور على الإجابات من مصادر غير آمنة أو غير مناسبة.

وعشان كده الحملة هتطلق 4 أفلام توعوية قصيرة، بتسلّط الضوء على كيفية بدء الحوار داخل البيت، وتحويل الأسئلة البسيطة لفرصة لبناء الثقة والأمان بين الأهل والأطفال بطريقة علمية وتربوية تناسب أعمارهم واحتياجاتهم النفسية، بدل ما الطفل يدور على الإجابات برة.

كمان المؤسسة أطلقت صفحة تعريفية خاصة بمنتجات التوعية والثقافة الجنسية للأطفال والمراهقين ضمن الحملة تقدر تشوفها من موقعهم safe-eg.org تحت عنوان kalemouhom-3an-eltamatem

وسارة عزيز، مؤسسة Safe Egypt، قالت إن الهدف من الحملة هو تقديم حلول عملية حقيقية للأهالي، مضيفة: "المشكلة مش إن الأطفال بيسألوا، المشكلة إن كتير من الكبار ما اتعلموش إزاي يجاوبوا"، عشان كده الحملة بتشجع على الحوار الأسري، لأن  الوعي مش بس بيحمي الأطفال، الوعي كمان بيبني ثقة وأمان جوه كل بيت.

وديبو مخرج الحملة، قال إن اختيار الطماطم جه لأنها موجودة في كل بيت وعلى كل سفرة، لكن أحيانًا تبقى موجودة من غير ما ناخد بالنا منها، وهو تشبيه لبعض المواضيع والأسئلة اللي موجودة حوالينا طول الوقت سواء اتكلمنا عنها أو لا.

أما مريم عزيز، الأخصائية النفسية الجنسية، قالت إن هدف الحملة وكتب الثقافة الجنسية هو مساعدة الأهل على إيجاد لغة بسيطة ومناسبة لعمر الأطفال، فالأطفال هيتعلمون عن الجنس في كل الأحوال، لكن السؤال الحقيقي هو: "مين اللي هيعلمهم؟ إحنا ولا غيرنا؟”

وماجد عطالله، مؤسس Popcorn، قال إن فريق العمل اتحمس من البداية للمشاركة في تنفيذ الحملة لأنها بتناقش قضية حقيقية تمس كل البيوت.