مسابقة في مدريد والجايزة ألف يورو للي "بيشخر" بصوت أعلى

ألف يورو، حوالي 20 ألف جنيه مصري ممكن تاخدهم ويبقوا بتوعك لمجرد إنك تنام وتشخر! دي مش نكتة، دي مسابقة في مدينة مدريد الإسبانية، الإسبان لقوا إن الشعب بتاعهم أهمل عادة النوم فقرروا يعملوا مسابقة يختاروا فيها أحسن واحد بينام، وشارك في المسابقة 360 بني آدم. كل المطلوب من المتسابقين يعملوه إنهم هيناموا في المول وهيختاروا منهم أحسن واحد نام ويدوله الجايزة.

علشان تبقى أحسن واحد نام أو ""نجم القيلولة"" في شروط، أولها طول فترة النوم، أفضل وضع للنوم، وأكثر ملابس نوم ملفتة، والأعلى شخيراً، والأعلى شخيرًا دي بتتحسب بأجهزة قياس شدة الصوت. التحدي بالنسبة للمتسابقين إنهم مطلوب منهم يعملوا الكلام ده في مكان عام زي مول تجاري، والدوشة والزحمة حواليهم. 

كمان مدة النوم مش مفتوحة، هما 20 دقيقة بس، ودي مدة الغفوة اللي بينصح بيها الأطباء، ولو قومت من النوم قبل 20 دقيقة دي تخسر. مسموحلك تسد ودانك وتستخدم قناعات النوم على عنيك، بس لو عملت كدة هيتخصم منك نقطة، لأن الأفضل إنك تنام طبيعي بدون ما تستعين بأي حاجة.