مصر أحتلت المركز السابع عالميًا في تلقي التحويلات المالية

بناءً على بيانات البنك الدولي، مصر احتلت المرتبة السابعة عالميًا في قائمة أكبر الدول اللي بتستقبل تحويلات مالية من العاملين بالخارج سنة 2024، بإجمالي تحويلات وصلت لـ 22.7 مليار دولار. وده خلف كل من الهند "129.1 مليار دولار"، المكسيك، الصين، الفلبين، باكستان، وبنجلاديش.
وبحسب بيانات البنك المركزي المصري، تحويلات المصريين بالخارج في الربع الأول من سنة 2025 زادت بنسبة 84.4%، ووصلت لـ 8.33 مليار دولار، مقارنة بـ 4.52 مليار دولار في نفس الفترة من سنة 2024، بعد توحيد سعر الصرف اللي بدأ في مارس 2024.

وبحسب تقرير الهجرة الدولية 2024، عدد المهاجرين في العالم وصل لـ 281 مليون شخص، يعني واحد من كل 30 فرد في العالم. والتحويلات المالية العالمية زادت من 128 مليار دولار سنة 2000 لـ 831 مليار دولار في 2024.

تحويلات المهاجرين للدول منخفضة ومتوسطة الدخل تخطت 5 تريليون دولار خلال العقد الأخير، ومن المتوقع إنها توصل لـ 4.4 تريليون دولار إضافية بحلول سنة 2030، وثلث المبلغ ده تقريبًا هيكون للمناطق الريفية.

 وده كان المعلومات اللي تضمنها البيان الصحفي الصادر عن الجهاز المركزي للتعبئة العامة والإحصاء بمناسبة اليوم العالمي للتحويلات المالية العائلية، اللي بنحتفل بيه في 16 يونيو من كل سنة، حسب ما أقرته الجمعية العامة للأمم المتحدة من سنة 2018. والاحتفال ده بيكون تقدير لجهود المهاجرين في دعم أسرهم و اقتصاديات بلادهم، خصوصًا في المناطق الريفية اللي فيها معدلات فقر وجوع عالية وبتعتمد بشكل كبير على التحويلات.