إصابة 52 مصري بالتسمم في مركب سياحي في الأقصر

محافظة الأقصر حصل فيها حادثة تسمم غذائي في أسبوع واحد اتصاب فيها أكتر من 52 مصري و2 سعوديين، جالهم تلبك معوي وتسمم.

وقال "ثروت العجمي"، مستشار غرفة شركات السياحة في الأقصر، إن ده هيأثر على سمعة مصر؛ "الوقائع ده هتدي سمعة مش كويسة لمصر لكن الحمد لله جت فينا، لو أجانب كانت هتعمل دوشة أكتر".

وكمِّل "العجمي" لـ"التحرير" إن السبب الرئيسي في حدوث التسمم الغذائي الإهمال في المطبخ، إن الطبخ تم باستعمال أدوات طهي من غير ما تتغل، أو إنها اتطبخ فيها بعد رش المركب بالمبيدات لقتل الحشرات، أو باستخدام مياه النيل من غير فلترة أو مياه معدنية.

"طيب عبد الله"، نقيب المرشدين السياحيين بالأقصر، قال إن الموضوع ممكن يكون خطأ مقصود من طاقم المركب بسبب تأخير فلوسهم، أو غير مقصود عن طريق تخزين السلع الغذائية بطريقة غلط.

وأكد "عبد الله" عدم تأثير حادثة التسمم على السياحة الخارجية، خاصة أن المصابين مصريين، فـ قال "المصريين مش بيهمهم حاجة وأحيانا بيدفعوا أكتر من الأجانب".