صعيدي عنده مدرسة لرقصة التنورة في إسبانيا

موقع "الوطن"، نشر قصة عن مواطن مصري من الصعيد، اسمه محمد السيد، عنده مدرسة لتعليم الرقص الروحاني ورقصة التنورة في إسبانيا. ورث محمد المدرسة من عمه، اللي كان عايش في إسبانيا وهو سافرله وكمل معاه. المدرسة بتستقبل ناس من سن 9 سنين لغاية 60 سنة، وفيها 10 فصول متقسمة ل5 مستويات، ورغم إن الموضوع مرتبط شوية بالصوفية وبعض المعتقدات الإسلامية، لكن محمد بياخد الناس من كل الأديان.

الموضوع بالنسبة لمحمد ماكانش سهل، لإنه صعيدي وصعب يتعلم الرقص، لكنه شايف إن الرقص بيوحد القلوب، زي المزيكا ما بتوحد الشعوب، وإن الفن عنده قدرة على التغيير أكتر بكتير من السياسة. حكى السيد كمان عن شغف سكان مدريد بالمدرسة وبالرقص، لدرجة إن في ناس بتعاني من اضطرابات نفسية، لكن بتلاقي علاجها في فصول المدرسة.