جزار عمل دار ضيافة مجانية لأطفال مستشفى 57 وأهاليهم

كل يوم بيتوافد على مستشفى 57357 أطفال وأهالي عشان يستنوا الجرعة الكيماوية من العلاج، أصحاب البيوت اللي حوالين المستشفى بيأجروا للناس اللي جايين من بره القاهرة الليلة ب 50 جنيه والشهر ب 3 آلاف جنيه، وده أعلى بكتير من إمكانيات الأسر البسيطة اللي بيضطروا يباتوا في الشارع، أستاذ "صيام" أو "عم ظاظا" زي ما أهل المنطقة بيطلقوا عليه، شاف إن عنده شقه ما بيستخدمهاش، فقرر يجيب فيها 7 سراير وعملها دار ضيافة مجانية، عشان الأهالي يباتوا فيها مع ولادهم.

عم ظاظا بيقول "أنا الحمد لله جزار، وبالنسبة لمصاريف الدار، والله لو بصرف عليها جنيه بيخشلي ألف جنيه"

 في ناس بقالها سنة واتنين بتتعالج في المستشفى وبيجوا من المحافظات بشكل يومي، حاليًا مش بيضطروا يسافروا ويرجعوا كل يوم، وبيقعدوا في ضيافة عم ظاظا، اللي بيوفرلهم مكان يناموا فيه وكمان أكل وشرب.