ست عاوزة تخلع جوزها علشان بيعملّها كل شغل البيت

زوجة مصرية جميلة، لسه عروسة جددية من أسبوعين بتشق طريقها وحياتها الجديدة مع جوزها، بس فجأة قررت ترفع قضية خلع! ليه كدة بس؟! علشان حاسة إن جوزي هو ست البيت، أنا كرهت حياتي معاه، ده هو اللي بيطبخ، وبيغسل، وبينشر الغسيل ويكوي الهدوم ويكنس وأنا طول اليوم قاعدة بتفرج عليه ومش بعمل أي حاجة. 

الزوجة بتقول أنا اتجوزت بعد قصة حب استمرت 3سنين، بس خلاص مش طايقة العيشة معاه، أنا حاسة إن ده مش بيتي وإني ضيفة في فندق، الموضوع وصل إن الراجل لو هيطبخ أكلة صعبة بيقعد يحضرها من بالليل علشان يصحى الصبح مايتعبش! أهل الزوج بيقولوا عنه إنه قبل الجواز ماكانش بيشيل حاجة من مكانها ولا بيعمل أي حاجة في البيت. الوضع النهائي إن الست طلعت على محكمة الأسرة تقولهم أريد حلًا.