203 قطعة آثار جديدة وتجديد المداخل والممرات: خطة "الآثار" لتطوير المتحف المصري

أعلنت صباح عبد الرازق، مدير عام المتحف المصري بالتحرير عن تفاصيل خطة وزارة الآثار لتطوير المتحف المصري بالتحرير، بالشكل اللي يتناسب مع القيمة التاريخية للمتحف ومقتنياته ومبناه الأثري. وحسب مدير المتحف فخطة التطوير بتشمل الآتي:

- تطوير نظم التحكم البيئية، ونظم الإضاءة والدهانات والأرضيات.

- تطوير مدخل المتحف، والممرات الجانبية للبركة بحديقة المتحف.

- سيناريو عرض جديد للتحف والآثار، يشمل مجموعة آثار كنوز تانيس، ومجموعة آثار تويا ويويا، أجداد الملك اخناتون واللي بتضم 203 قطعة أثرية، بيُعرض منها في الوقت الحالي عدد من القطع في معرض الآثار المؤقت في موناكو وهترجع تاني للمتحف في شهر سبتمبر اللي جاي.

"عبد الرازق" قالت إن المجموعات الجديدة دي ماتقلش في أهميتها عن مجموعة الملك توت عنخ آمون. من المفترض إن أعمال التطوير تخلص ويتم افتتاح المتحف في نوفمبر الجاي.