فريق من هندسة عين شمس عمل عربية سباق، وشارك في مسابقة في بريطانيا

Asurt  هما فريق من قسم ميكانيكا وكهرباء في هندسة عين شمس اتأسس سنة 2010 لكنه مستمر وبيشارك فيه طلبة على مراحل مختلفة، شاركوا السنة اللي فاتت في مسابقات مختلفة اهمهم Formula student UK بتقولنا "إيمان" عضوة الفريق: "في المسابقة دي بنحاول نعمل عربية سباق بخبراتنا كطلبة ونطبق العلم اللي بندرسه، واخر انجاز حققناه هو إننا كنا المركز 28 على مستوى العالم والفريق الأول على مستوى إفريقيا والعالم العربي".

الفريق كمان شارك في مسابقة ShellEcoMarathon وهدفها إنك تمشي اكبر مسافة بأقل كمية بنزين، وقدروا طلبة عين شمس يمشوا 248.5 كيلو متر بلتر بنزين واحد. وصمموا روبوت يقدر يغطس ويعوم على عمق 1 كم.

يوم 1 فبراير الفريق عامل event  اسمه SEMulation هدفه محاكاة لكل اللي بيحصل في مسابقة ShellEcoMarathon وهيشارك فيه كل الفرق المصرية اللي هتروح المسابقة، وفيه متكلمين مختلفين ممكن تعرف أكتر عن الفريق والايفنت من هنا.