"مصر الدفيانة" حملة لحماية الفقرا من برد الشتا

الشتا وصل وكل سنة بيكون برد أكتر من اللي قبلها. وبالنسبة لبلد فيها عدد كبير من الفقرا والمحتاجين، بنلاقي دايما بيوت كتيرة مبنية بخامات رخيصة وبدون سقف، وناس كتير ماعندهاش بطانية تدفيها من برد الشتا. حملة "مصر الدفيانة" هي حملة بيعملها الإعلامي عمرو أديب بشكل سنوي، الهدف منها جمع تبرعات تساعد غير القادرين على مواجهة البرد. هدف الحملة السنة د زي ما قال أديب، هو جمع 2 مليون بطانية.

التبرعات بتروح بشكل أساسي لشرا البطاطين وكمان إقامة أسقف للفقراء والمحتاجين. أديب طلب من المتابعين إنهم يتضامنوا مع الحملة وينشروا هاشتاج "مصر الدفيانة" على مواقع التواصل. بالإضافة للمشاركة في الحملة، طول ما أنت ماشي في الشوارع هتقابل ناس مشردين مالهمش بيوت وبيناموا على الرصيف، تقدر تشتري بطاطين وغطا وتوزعه، وتقدر تتبرع بمبالغ مالية للحملة وكل المؤسسات اللي بتقوم بنفس الدور.