235 مليون جنيه لحماية قلعة قايتباي من موج البحر

الدكتور محمد سلطان محافظ الإسكندرية، قال إنه هيتم تنفيذ مشروعات حماية الشواطئ بقيمة أكتر من مليار و200 مليون جنيه، منها مشروع ترميم قلعة قايتباي بقيمة 235 مليون جنيه هيبدأ أبريل الجاي. 

محافظة الإسكندرية قالت إنه هيتم ترميم الصخرة الأم اللي اتبنت عليها القلعة وتنفيذ مشروع حواجز لحمايتها من التآكل بسبب الأمواج، وده عشان القيمة التاريخية لقلعة قايتباي، خصوصًا بعد التقييمات اللي أجراها خبراء آثار وجيوفيزيائيين، وقالوا إن القلعة معرضة للانهيار بسبب تجاويفها المليانة بمياه البحر، وزارة الآثار قالت إن آخر تفتيش كان في يوليو 2017 وإن القلعة بخير لكن هيراقبوا الموج عشان مايحصلش أي تدمير ليها.

المشروعات اللي هتتعمل في إسكندرية، منها كمان تطوير مطار برج العرب عشان يستقبل 4 مليون راكب كل سنة، وتنفيذ 13 ألف وحدة سكنية في منطقة برج العرب، و880 وحدة بطوسن، وإنشاء مجمع للصناعات البلاستيكية باستثمارات توصل لـ60 مليون جنيه.