وزير التعليم: هنبدل الكتب الورقية بالإلكترونية

الدكتور طارق شوقي، وزير التربية والتعليم، قال إن الوزارة عندها خطة علشان تبدل الكتب الورقية بالكتب الإلكترونية والديجتال، الوزير قال كمان إن طباعة الكتب الورقية بتكلف الدولة حوالي 2 مليار جنيه، وإنه يتمنى إن ابنه يتمنع عنه كل الكتب الورق، ويدرس بس باستخدام الأدوات الإلكترونية. الوزير كان ضيف على برنامج "يحدث في مصر" مع الإعلامي شريف عامر على قناة MBC MASR

كمل شوقي تصريحاته: "مش معقول يبقى في مواطن بيعرف يستخدم فيسبوك وواتساب ومش قادر يوصل لموقع بنك المعرفة"، أكد كمان إن هتكون في تغييرات في العام الدراسي الجديد، من ناحية المناهج وأداء المدرسين، غير المدارس اليابانية اللي هتفتح قريب، ومدارس النيل اللي هيكون في توسع فيها الفترة اللي جاية.