مصر هتعمل انتخابات مجالس محلية لأول مرة من سنة 2008

أعلن متحدث باسم البرلمان المصري، "صلاح حسب الله"، إن مصر هتعمل انتخابات الإدارات المحلية في الربع الأول أو التاني من سنة 2019. وهتكون بكده أول انتخابات محلية تشهدها مصر من سنة 2008.

وقال المتحدث لموقع إرم نيوز: "إن مجلس النواب سينتهي خلال دور الانعقاد الحالي من قانون الإدارة المحلية، الذي يعد ضرورة حتمية لإجراء انتخابات المحليات".

 من ناحية تانية أكد وزير الشباب والرياضة المصري، "خالد عبدالعزيز"، على إجراء انتخابات المحليات قبل نهاية سنة 2018. وسبق وقال رئيس الوزراء المصري "شريف إسماعيل" قدام البرلمان، في مارس 2016، إن الانتخابات المحلية هتتعمل في الربع الأول من 2017، لكن ده ماحصلش.

المتحدث باسم البرلمان أشار لإن التأخير ده بيرجع لانتظارهم لحد إصدار قانون الإدارة المحلية، وبعدين صدوراللائحة التنفيذية للقانون بعد خمس شهور، وتصديق الرئيس عليها عشان يتم البدء بعد كده في إجراءات الانتخابات.

جدير بالذكر إن مصر مافيهاش مجالس محلية من يونيو 2011، لمَّا صدر حكم قضائي بحلها في أعقاب ثورة 25 يناير اللي أطاحت بالرئيس الأسبق "حسني مبارك" بعد 30 سنة في الحكم.