أول بنت محجبة هتمثل مصر في بطولة العالم للقوة البدنية

خلود عصام، سمعت الاسم ده قبل كدة؟ ممكن، لو ماسمعتش فخلود عملت حاجة غير مألوفة عندنا شوية، أو غير مألوفة عمومًا. خلود بقت أول بنت مصرية محجبة، هتمثل مصر في بطولة العالم للقوة البدنية في روسيا. خلود كانت ضيفة على قناة دي أم سي وحكت أكتر عن تفاصيل رحلتها وتجربتها في لعبة بتصنف إنها رجالي وخشنة بالنسبة لبنت.

بدأت خلود تلعب كمال أجسام ورياضة من 3 سنين بس علشان كانت عاوزة تبني جسمها وتخليه أقوى. وفي أبريل اللي فات خاضت أول بطولة ليها وكانت بطولة العرب وحققت فيها مركز أول. بعد كدة حققت مركز أول في بطولة تجارب العالم، وده خلاها تقدر تشارك في بطولة العالم في روسيا. الأزمة حاليًا إن الاتحاد ماصرفلهاش مبلغ السفر والتأشيرة، وقالولها ادفعي أنتي وهنبقى نديكي الفلوس، لكن هي مصممة تمثل مصر في البطولة.