جامعة العريش هتعفي الطلبة من الرسوم والمصاريف الدراسية

جامعة العريش في محافظة شمال سيناء، قررت تعفي جميع الطلاب في كل الكليات بتاعتها، من الرسوم والمصاريف الدراسية، وده علشان يخففوا على أولياء الأمور في ظل الظروف الموجودة في المحافظة، والعملية الشاملة اللي بيخوضها الجيش المصري ضد المجموعات الإرهابية هناك.

د. حبش النادي رئيس الجامعة، بعت رسالة يطمن فيها جميع طلاب الجامعة وأولياء أمورهم، ووعد إن مع استئناف الدراسة مرة تانية، هيتم تكثيف المحاضرات وحذف الأجزاء اللي مش مهمة من المقرر مع إضافة أسبوعين زيادة لمدة الدراسة. كمان أعضاء هيئة التدريس قرروا يعفوا الطلبة من شراء أي كتب أو مذكرات، كمساهمة منهم في التخفيف على الطلبة والأهالي.