فيسبوك هيراقب الناس اللي عندهم ميول انتحارية عشان يلحقهم

أعلن "فيسبوك" عن نظام ذكاء اصطناعي جديد هيسهل تحديد الناس اللي عندهم ميول انتحارية، عشان يقدروا يقدموا المساعدة ليهم، النظام ده هيرصد أي إشارات ممكن تدل على أي ميول انتحارية، سواء في الرسايل أو الفيديوهات، وهيبلغوا بيها الجمعيات اللي هيقدرو يقدموا الدعم والمساعدة ليهم

الفيسبوك كان عمل أدوات تخليك تبلغ عن نيتك للإنتحار، لكنهم شايفين إن التقنية الجديدة هتساعد في اكتشاف الحالات دي بشكل أسرع. "مارك زوكربرج" مدير الفيسبوك كان قال في فبراير اللي فات، إنه كان ممكن نتفادى أحداث مأساوية كتير، من بينهم حالات انتحار، كانت في بث مباشر على فيسبوك، لو كان حد اكتشف الموضوع بشكل أسرع وبلغ السلطات.

النظام ده هيتجرب في أمريكا قبل ما يتعمم على العالم، في حين إنه ممكن ما يتطبقش في أوروبا، بسبب سياسات أوروبا المتشددة في حماية البيانات الشخصية لمواطنيها، فيسبوك بقالها سنين بتتعاون مع جمعيات معنية بالصحة العقلية، عشان يحجموا الإنتحار، ويساعدوا الأشخاص اللي بيعانوا إنهم يلاقوا الدعم المناسب في الوقت المناسب