ست زوَّرت بطاقة جوزها وخدت حكم غيابي ضده بسبب خلافات بينهم

"محمد لبيب موسى"، 43 سنة، مقيم في طور سيناء وشغَّال سوَّاق، اتفاجيء وهو بيستخرج بيانات محل اﻹقامة من السجل المدنى، إن محل أقامته متغيير، مش بس كده، ده صادر ضده أحكام غيابية بالحبس!

الموضوع راجع لخناقة أسرية بينه وبين مراته اللي رفضت تعيش معاه في طور سيناء ورجعت لأهلها في الزقازيق، وعشان بنتها كانت عايشة معاه بعيد عن أمها، قررت الأخيرة تنتقم. فـ عملت بطاقة مزورة ليه من الزقازيق، ورفعت قضايا تبديد منقولات ونفقة زوجية وسرقة وشيكات بدون رصيد عليه كانت هي اللي بتستلم ورقها بالنيابة عن جوزها، فـ صدرت أحكام غيابية وبقى دلوقتي مهدد بالسجن وممنوع من رؤية ولاده بعد ما خدتهم منه مراته.

"لبيب" في الأساس كان رايح يستخرج أوراق ثبوتية عشان يتقدم لوظيفة ضمن نسبة 5% معاقين، لاعتباره ضمنهم بما إنه عامل قلب مفتوح. فـ اتفاجيء إنه ليه بطاقة تانية صادرة من مركز هيهيا في الشرقية.

عشان مافيش قدامه حلول كتير، "لبيب" بيستغيث بوزير الداخلية والعدل للتحقيق في الواقعة عشان مايتسجنش ظلم، وقال إنه حرر محضر ضد زوجته وأسرتها، وصدر قرار ضبط إحضار ليها لكن لسّه ماتنفذش.