طيارة قطرية عملت هبوط اضطراري بسبب خناقة بين ست وجوزها

عقاب الزوج الخاين ممكن يبقى إيه؟ السؤال ده أكيد راود الشاب الإيراني اللي اكتشفت زوجته خيانته وهما في طيارة مُتجهة بيهم من الدوحة لمدينة بالي، بس اللي ماتوقعهوش إن غضب مراته وثورتها توصل للحجم اللي يجبر الطيَّار على الهبوط الاضطراري.

الزوجة الغاضبة بتقول إنها استخدمت صباع جوزها وهو نايم لفتح موبايله عن طريق البصمة، ومن هنا اكتشفت خيانته ليها مع أكتر من واحدة. بعدها ماحستش باللي بتعمله، لدرجة إن طاقم الطيارة والركَّاب اتدخلوا لتهدئتها، لكن الموضوع كان خارج السيطرة، فاضطر الطيَّار يهبط بالطيارة بشكل اضطراري في مدينة تشيناي في جنوب الهند.

الغريب إن بعد الهبوط الزوجين قضّوا يومهم في مطار تشيناي ومنه اتوجهوا لكوالا لامبور، مش معروف لاستكمال أجازتهم ولا ليه، وبدون أي إجراء ضدهم من قبل الشرطة.