بنت مصرية عايزة تبقي أول ست تلف مصر بالعجلة لوحدها

همسة منصور بنت مصرية عندها ٢٩ سنة، عايزة تبقى أول ست تسافر حوالين مصر بعجلة لوحدها، همسة هتبتدي تتدرب على الرحلة اللي مخططة إنها تخلص في يناير ٢٠١٩ عن طريق إنها هتعمل رحلة قصيرة حوالين سيناء والبحر الأحمر لمسافة ٧٧٥ كيلومتر، وتتخلص الرحلة في ١١ يوم.

موقع Stepfeed اتكلم معاها، وقالت إن اللي شجعها تعمل الرحلة دي، إيمانها إننا اتولدنا في الطبيعة وإن أهم دروس اتعلمتها في حياتها كانت وهي بتتتسلق الجبال أو بتسوق العجلة، وده بالظبط اللي هي عايزة تعمله. همسة بتقول إنها عايزة تستخدم جسمها في إنها تتحرك من مكان للتاني وتتحدى نفسها عقليًا وجسديًا، وتخرج من دايرة الراحة النفسية اللي ممكن تكون حاطه نفسها فيها، وكمان هي بتسعى إنها تلهم الناس حواليها وتوريهم إن في طريقة بديلة للحياة

حاجة كمان ضافتها همسة، وهي إنها عايزة تغير وجهة نظر المجتمع عن فكرة إن رياضات المغامرة مختصة بالرجالة بس، وبتتمنى إن الستات ماتحددش اللي تقدر أو ماتقدرش تعمله على أساس نوعها. تقدر تتابع همسة من هنا