ست بتسوق أول أتوبيس نقل عام للستات بس في مصر

الشركة الإنجليزية للنقل الجماعي قررت تعمل أتوبيسات نقل عام مخصصة للستات بس، بما فيهم اللي بتسوق، الفكرة جت بهدف حماية الستات من التحرش، زي فكرة عربية السيدات في المترو. واحدة من السائقات قالت للمصري اليوم، إنها كانت بتدور على شغل وماكانتش لاقية، لحد ما لقت الإعلان بتاع الشركة وقررت تقدم، وقالت إنها ماكانتش بتعرف تسوق بس الشركة علمتها لحد ما بقت محترفة.

طبيعي إن كان في تخوف من مضايقة سواقين الأتوبيسات والمكروباصات الرجالة بس الغريب إن كل اللي في الموقف دعمها ودعم الفكرة ولاقت استحسان كبير من الراكبات كمان. الشركة دلوقتى بتسعى لتدريب سائقات أكتر عشان تشغلهم على أتوبيسات في مناطق مختلفة. الأتوبيس الحالي بيتحرك من ميدان الجيزة لهضبة الأهرام.