السعودية: مساعدة الحجاج في أداء المناسك هتكون إلكترونية سنة 2030

نشرت وزارة الحج والعمرة السعودية على موقعها الرسمي فيديو بيعرض فيه تصور للحج سنة 2030. 

الفيديو عرض مجموعة من الحجاج بيحكوا تجربتهم مع الحج في 2030، وبيقولوا إن في بداية الحج بيستلموا صندوق فيه بطاقه إلكترونية وسوار ذكي للإيد، بيشتغل بالموبايل أول لما تبدأ مناسك الحج، وعن طريق مسح السوار بالبطاقة الإلكترونية، بتدخل المملكة من غير إجراءات جمركية أو طابور. وكمان الحاج هيلاقى ترحيب بيه شخصيًا على الشاشات على طول أول لما يدخل المطار. وفيه قطار متطور بيستخدمه الحجاج بالبطاقة الذكية، بيوصلهم مكة المكرمة في وقت قياسي.

البطاقة اللي معاك دي كمان بتستخدم كمفتاح لغرفتك في الفندق، ومش هيحتاج الحجاج إنهم يسجلوا دخول في الفندق. السوار اللي في إيدك هيساعدك لما تبدأ المناسك، مثلًا هيحسبلك أشواط الطواف علشان متنساش، وسماعات الأذن هتقولك تعليمات الحج وازاى تتحرك ولفين وهتقول للحاج أدعية للطواف بدل المطوف، وكمان بتوفر خدمة الترجمة الفوريه علشان تسهل على الناس التعامل مع كل الجنسيات.