"ازاي تستخدم الكاندوم" فيديو لبناني للتوعية الجنسية بطله حامد سنو

منظمة غير حكومية في لبنان مهتمة بالصحة الجنسية، عملت فيديو بتوضح فيه طريقة استخدام الواقي الذكري "الكاندوم"، الفيديو ظهر فيه حامد سنو مغني فرقة مشروع ليلى المعروف، والممثلة يمنى غندور، الفيديو هدفه التوعية عن الأمراض الجنسية وازاي ممكن تتنقل.

ديانا أبو عباس المديرة التنفيذية لمنظمة "Marsa"، قالت لموقع stepfeed إنهم عايزين يشجعوا الشباب يستخدموا الكاندوم، علشان فيه ارتفاع ملحوظ في أعداد المرضى بالإيدز، خاصة اللي أقل من 25 سنة. 

في لبنان لوحدها فيه حوالي 3750 شخص مصابين بمرض نقص المناعة البشرية "الإيدز"، وفقًا للحملة الوطنية لمكافحة الإيدز اللي عاملاها الحكومة اللبنانية، وعلشان كدة بتقول "ديانا" إن مهم إن الشباب يعرفوا إيه هو الجنس الآمن.

المنظمة اختارت حامد سنو علشان شعبيته وتأثيره على الشباب، واختاروا ممثلة كمان علشان يعرفوا البنات إن "الكاندوم" مش مسئولية الراجل بس.