ست كفيفة خلعت جوزها عشان جاب واحدة البيت وهي موجودة

"في بيتي وعلى سريري".. "نبيل. ع." حوِّل الإفيه ده لحقيقة، لمَّا خان مراته "هالة. أ." الكفيفة في بيتها وعلى سريرها، بس الجديد إن الخيانة تمت في وجودها كمان!

الموضوع بدأ لمَّا دخل الزوج البيت بواحدة، في وجود مراته اللي حسّيت بدخوله البيت ونديت عليه، بس عشان خطته تكمل، عمل مش سامع ودخل بالبنت أوضة نوم "هالة". سرعة بديهتها خلِّتها تكلِّم والدها عشان ييجي ويبقى شاهد على خيانة جوزها، لكن لمَّا ماردش راحت لجارتها اللي شافت الزوج وهو نازل مع واحدة غريبة، واستنيت وصول أبو "هالة" عشان تحكي له شافت إيه. "هالة" بتقول لمصراوي "فاكرني عشان مش شايفة يبقى كمان مش حاسة، بس أنا فخورة إني باخلص منه."

 دلوقتي "هالة" مستنية دورها في رول محكمة الأسرة في "زنانيري" لنظر دعوى الخلع اللي رفعتها ضد جوزها برقم 780لسنة 2018.