إسرائيل قبضت على بنت فلسطينية وأسرتها بعد انتشار فيديو بتضرب جندي فيه

اقتحمت قوات الاحتلال الإسرائيلية، قرية النبي صالح الفلسطينية، عشان يقبضوا على الناشطة "عهد التميمي"، بعد ما ظهرت في فيديو بتطرد وتضرب جندين احتلال قدام بيتها.

الموضوع بدأ لمَّا حاول جندي يدخل بيت "عهد" لأول مرَّة، فدفعته وطردته عشان مايدخلش بيتها، وصوَّر والد البنت المشهد، اللي ظهرت فيه الأم كمان. وبعده انتشر هاشتاج من قبل الإسرائيليين على وسائل التواصل الاجتماعي، بيطالبوا فيه باعتقال البنت عشان أهانت الجيش الإسرائيلي. اعتقال "عهد" كان متوقع، وحصل فجر النهاردة، البيت اتحاوط بأكتر من 50 جندي، اقتحموا الأوض وقلبوها، وبعدين حاصر "عهد" جندين وخدوها بالكلابشات لبرّه. ونشر فيديو اعتقالها التلفزيون الإسرائيلي.

"عهد" مش أول مرَّة تشتبك مع مجند من جيش الاحتلال، قبل 3 سنين انتشرت صورة ليها وهي بتعض إيد جندي بيضرب أخوها.