متحف اللوفر هيفتح في أبو ظبي

الإمارات العربية المتحدة اتفقت مع فرنسا على فتح فرع لمتحف اللوفر في أبو ظبي، هيفتح يوم 11 سبتمبر، المتحف بيتحضرله من 2007 وأخيرًا بقى جاهز للافتتاح. المتحف هيكون أول متحف "عالمي" في الشرق الأوسط حسب ما بيقول الموقع الإلكتروني ليه، وهيشرف عليه هيئة أبو ظبي للسياحة والثقافة، بالتعاون مع 13 متحف فرنسي غير اللوفر، وصمم شكل المتحف مهندس معماري فرنسي والقبة بتوزن نفس وزن برج إيفل، وموجود وسط المية.

المتحف هيكون فيه آثار ولوحات من عصور مختلفة للعالم كله، ومن ضمنها قطع أثرية من متاحف فرنسا، مثلًا فيه قاعة القوى العظمى الأولى، ودي ليها علاقة بالفراعنة بشكل كبير، وقاعة الإمبراطوريات والحضارات القديمة، وقاعة الأديان العلمية، وقاعة طرق التبادل التجاري الأسيوي، وقاعة للعالم الحديث وقاعات تانية كتير. المتحف كمان بيضم متحف خاص بالأطفال وهيستقبل من سن 6 سنين لـ11 سنة.

المتحف بدأ يبيع تذاكره من دلوقتي، وكل أخباره موجودة على الموقع الخاص بيه.