دار أوبرا جديدة هتفتح في مدينة 6 أكتوبر

 دار الأوبرا من أهم الأماكن في مصر اللي بتقدم عروض فنية وثقافية لجمهور واسع، فأكيد لما يقرروا يفتحوا دار أوبرا جديدة في محافظة أكتوبر، دي حاجة كويسة، امتى هيحصل الكلام ده؟ بعد ما رئيسة دار الأوبرا المصرية إيناس عبد الدايم، بقت وزيرة ثقافة، مسك مكانها الدكتور مجدي صابر كقائم بأعمال الرئيس. صابر قال في تصريحات نشرتها "بوابة الأهرام"، إن خلال سنتين هنكون فتحنا دار أوبرا أكتوبر.

صابر أضاف إن المكان ده فيه مسرح كبير وقاعات تدريب، وهيجذب جمهور من كل مكان. صابر وضح كمان إنهم خلال الفترة الجاية هيطوروا المهرجانات الخاصة بدار الأوبرا وهيجيبوا نجوم جديدة تشارك في مهرجانات القلعة والمهرجان الصيفي ومهرجان الإسكندرية والسهرات الرمضانية، لإن التنويع هو السبب الرئيسي في نجاح مهرجانات الأوبرا، زي ما بيقول.