محطة مترو بشكل "فرعوني" في منطقة الأهرامات

المرحلة الأولى من الخط الرابع لمترو الأنفاق هيبقى فيها محطة مترو عند الأهرامات على طول، تحديدًا جنب المتحف الكبير اللي بيتبني دلوقتي في منطقة الأهرامات، وهيكون كمان في جوّه المحطة مول تجاري وبازرات بتبيع تذكارات فرعونية. المحطة هتكون على الطراز الفرعوني علشان تتناسب مع المكان، ودي زيها زي المحطة اللي هتبقى في منطقة خان الخليلي، واللي برضه هتكون مبنية على طراز منطقة خان الخليلي.

رئيس الهيئة القومية لمترو الأنفاق، قال لليوم السابع، إن حاليًا بيتم دراسة العرض المقدم من الشركة اليابانية من خلال المناقصة اللي طرحتها الهيئة، علشان تشوف مين الجهة اللي هتقوم بأعمال حفر وتنفيذ الخط الرابع، وغالبًا بداية الشغل هتكون سنة 2018. المرحلة الأولى من الخط الرابع بتمر بشارع الهرم وطولها 19 كيلو.