البرشطة مدرسة: ولد وبنت بيبرشطوا على الناس في الصور

أكيد في حياتك سمعت كلمة "برشطة" أو يمكن تكون بتستخدم كلمة برشطة علشان توصف ناس من أصحابك أو معارفك. "البرشطة" فن مصري معروف، أو الأصح نسميه تقليد معروف، مافيش خروجة تفوت غير وتلاقي واحد قرر من طرف واحد إنه معزوم معاكم، وإنكم تستحقوا شرف وجوده. هو ده البراشوت. المعاناة من البرشطة زادت اليومين دول، المعروف إن البرشطة ممرمطة، بس في اتنين مانعرفش عنهم حاجة شايفين إن البرشطة مدرسة!

ولد وبنت مانعرفش هما مين، ماشيين في كل مكان يبرشطوا على صور الناس، ولابسين تيشرتات مكتوب عليها البرشطة مدرسة! مين دول ومين اللي وراهم؟ الولد والبنت دول لوحدهم ولو في جهة بتحركهم؟ هيظهروا في القاهرة بس ولا هيبرشطوا على الناس في أماكن تانية؟ الموضوع شكلة كبير، ما هو لو مش كبير يبقى وازاي كدة بقالهم إعلانات في الطرق والكباري فجأة؟ حتى الحيطان بقى ممكن تمشي في الشارع تلاقي مرسوم عليها اللوجو بتاعهم! مين دول وعاوزين إيه؟ ومين اللي هيعوض البشر عن كل الصور والخروجات والفسح اللي باظت بسبب البرشطة؟ مين هيجاوب علينا؟