الشرطة قبضت على ظابط و4 أمناء عملوا عصابة في الجيزة بتسرق البيوت بحجة تفتيشها

أمر المستشار "محمد عبد السلام"، المحامى العام الأول لنيابات شمال الجيزة الكلية، بحبس ظابط شرطة برتبة ملازم أول و3 أمناء و6 بودى جارد، 4 أيام على ذمة التحقيقات، لاتهامهم بتكوين تشكيل عصابي لسرقة المساكن والأموال بعد ما بيضحكوا على أصحاب المساكن دي ويفهموهم إنهم ظباط أمن وطني. 

ظهر في التحقيقات إن المتهمين ظابط بالبحث في مديرية أمن الجيزة و4 أمناء في الجيزة و6 بودى جاردات، وإنهم جمعوا معلومات عن رجل أعمال سودانى بيغيير مبالغ مالية كبيرة من البنك كتير فخططوا لسرقة فلوسه.

واتوجهوا فعلا لشقته فى مساكن أرض اللواء في العجوزة واقتحموها. وكان صاحب الشقة معاه 4 صحابه من السودان، فاحتجزوهم في أوضة وقفلوها عليهم بحجة إنهم ظباط أمن وطني، وسرقوا 16 ألف دولار من خزنة حديدية.

وبعد ما سرقوه خدوه وهو معصوب العينين في عربية سوزوكي ورموه على الطريق الدائري، فـ عرف إنهم مش ظباط وراح حرر محضر بالواقعة. ومن خلال التحريات توصلت الأجهزة لهوية المتهمين وقبضت عليهم واستعادت 700 ألف جنيه من اللي اتسرقوا.

وكشف واحد من المتهمين عن إنه اشترى سيارة غالية وحط مبلغ 200 ألف جنيه فى حساب مراته وتم توزيع باقي المبلغ على باقي المتهمين، ووجهت النيابة للمتهمين اتهامات السرقة بالإكراه وقبض واحتجاز بالإكراه وحيازة أسلحة.