منع الصيدليات من إنها تدي حقن إلا في وجود صيدلي أو ممرض معاه شهادة

الدكتور مصطفى السيد، رئيس إدارة التفتيش الصيدلي بوزارة الصحة، قال إن الإدارة المركزية للصيدلة هتصدر تعميم لكل الصيدليات بعد العيد، بيمنع أي صيدلية إنها تدي حقن، إلا في حالة وجود الصيدلي أو ممرض معاه شهادة إسعافات أولية. القرار ده معناه إنك مش هتقدر تدخل أي صيدلية تطلب إنك تاخد حقنة غير لو في صيدلي أو ممرض دارس إسعافات أولية.

"السيد" أضاف إن الصيدلي مش شغلته يدي حقن وقانون مزاولة المهنة مش بيتضمن الحاجة دي، بس الموضوع جائز لو هو جايب ممرض معاه شهادة إسعافات أولية. نقابة الصيادلة كانت قالت إنها بتدرس منع إعطاء الحقن في الصيدليات، بسبب وفاة طفلة في البحيرة بعد ما اخدت حقنة عن طريق الخطأ في صيدلية.