طفل مصري أخد براءة اختراع ببرنامج بيحول لغة الإشارة لصوت مسموع

"مصطفي عاطف"  طفل في أولى ثانوي في محافظة الغربية، أخد براءة اختراع على برنامج التواصل مع "الصم" اللي اسمه Equal، اللي هيخليهم يتكلموا مع الأشخاص التانيين ويفهموهم بسهولة.

من عمر الـ 16، "مصطفى" كان حلمه التطبيق ده، اشتغل عليه في أيام الأجازات بس، الجمعة والسبت، وخد فترة 3 شهور عشان يعمله، وفي يوم 5 فبراير، خد براءة الاختراع. التطبيق ببساطة بيحول لغة الإشارة اللي بيتكلم بيها الشخص الأصم لصوت مسموع، وبيحول لغة الشخص اللي بيتكلم لرموز يفهمها الشخص ضعيف السمع.

"مصطفى" اشتغل على التطبيق لوحده بمساعدة واستشارة الدكتور "سيد سلام"، الأستاذ في كلية هندسة طنطا، اللي بيقول: "الأصم هيكون قدامه صورة تفاحة على سبيل المثال، وبالضغط عليها هتتحول لصورة تشرح المقصود بيها في لغة الإشارة". فيه مشروعات تانية اخترعها "مصطفي" وهو عمره 6 سنين، منهم روبوت كاشف للألغام وروبوت مكتشف للأماكن الأثرية.

في المستقبل "مصطفى" بيحلم إنه ياخد منحة في عالم التكنولوجيا MIT، أكبر معهد في أمريكا، وقال "نفسي أغير في بلدي وأساعد الناس"