يفط جديدة في وسط البلد بتعرفك تاريخ الشوارع

الجهاز القومي للتنسيق الحضاري، بدأ تنفيذ المرحلة الأولى من مشروع "حكاية شارع" واللي هتضم شوارع: عبد الخالق ثروت وطلعت حرب وشامبليون وميريت باشا وعدلي والألفي وصبري أبو علم. المهندس "محمد أبو سعدة" رئيس الجهاز القومي للتنسيق الحضاري، أعلن عن إن المشروع هدفه الحفاظ على التراث المعماري المميز والتراث الثقافي، وده هيحصل عن طريق التعريف بشوارع مصر اللي حصل فيها قصص تاريخية.

هتتحط لوحة تعريفية على مداخل الشوارع باللغتين العربية والإنجليزية، واليافطة هتكون باللون الأزرق وهيكون مكتوب فيها معلومات عن حكاية الشارع وسبب تسميته بالاسم ده وعرض للأماكن والمعالم التاريخية والأثرية، وهتتحط على عامود في مدخل الشارع، وعرضها هيكون 50 سم، وطولها 70 سم وارتفاع العمود نفسه 300 سم من الأرض.