صاحب مدرسة خاصة متهم باغتصاب أطفال في كي جي1

مدرسة لغات خاصة في مصر الجديدة، حصلت فيها واقعة اغتصاب ل3 تلاميذ، ده الكلام اللي قاله أولياء أمور التلاميذ، قالوا كمان إن الشخص اللي اعتدى على ولادهم، هو نفسه صاحب المدرسة. الكلام والاتهامات استدعت رد من وزارة التربية والتعليم، اللي قالت إنها هتحقق فورا في الواقعة، كمان أولياء الأمور عملوا تجمهر قدام المدرسة واخدوا المتهم على قسم شرطة النزهة وعملوا محضر ضده

النهاردة كمان، عدد أكبر من أولياء الأمور راحوا المدرسة وطلبوا بسحب ملفات أطفالهم علشان ينقلوها لمدرسة تانية. في واحدة من الأمهات الموجودات في المدرسة، قالت إن في لجنة من الوزارة وصلت للمدرسة، وأكدت لأولياء الأمور إن المدرسة هتفضل تحت الإشراف المالي والإداري للوزارة، واطمنوا على ولادكم يا جماعة.

الواقعة بترجع لما طفل من الأطفال حصلتله مشكلة في التبرز، ولما راح لدكتور أكد إن الطفل حصله اعتداء جنسي، بعدها الطفل اتعرف على الراجل اللي عمل فيه كدة واللي طلع صاحب المدرسة، حسب كلام أولياء الأمور.