إعادة امتحان في طب طنطا بعد ما الكلية وزعت ورق الأسئلة ومعاه نماذج الإجابة

امتحان "النسا والتوليد" كلية الطب جامعة طنطا، اتعاد بسبب خطأ غريب حصل. حسب المنشور في جريدة المصري اليوم امبارح، إن عميد الكلية الدكتور عبد الرؤوف فرحات، اكتشف مع بداية امتحان مادة "النسا والتوليد" للفرقة التالتة، إن ورق نماذج الإجابة متوزع مع ورق الأسئلة! طب ما التعليم سهل أهو والحياة جميلة يا جماعة.

القائم بأعمال رئيس جامعة طنطا، بيحقق في المذكرة اللي جاتله من عميد كلية طب، عن الخطأ اللي حصل وتسبب في توزيع نماذج الإجابة لازقة في ورق الأسئلة. بعد ما الورق اتوزع واكتشفوا الخطأ، سحبوا الورق كله تاني، وجات لجنة عملت امتحان جديد وطبعوه، وبالتالي زودوا مدة الامتحان ساعتين بعد الوقت الأصلي.