محمد صلاح اتبرع لقريته ب8 مليون جنيه عشان يعملوا مشروع صرف صحي

نجم ليفربول المصري محمد صلاح، اتبرع بقطعة أرض 5 فدادين قيمتها 8 مليون جنيه لأهالي قريته "نجريج" التابعة لمركز بسيون بمحافظة الغربية، عشان يعملوا عليها محطة صرف صحي تخدم أهالي القرية. حسب جريدة "الدستور"، صلاح اتفق مع والده على شراء قطعة الأرض من المالك والتبرع بيها بعد كده.

الاتفاق اللي تم، إن مالك الأرض هو اللي يتعاقد مع شركة المياه، ووالد صلاح هيكتفي بالتوقيع على العقد كشاهد، بشرط تكون الأرض تبرع بدون عوض بهدف إقامة محطة تنقية صرف صحى لقريتى نجريج وشبراطو وتوابعهم بمركز بسيون. وحسب الجريدة، محافظ الغربية اللواء أحمد ضيف صقر، اتصل بوالد اللاعب وشكره على الأعمال الخيرية اللي بيقوم بيها صلاح في المحافظة.

صلاح سبق واتبرع بتمن وحدة إسعاف مجهزة بالكامل في قريته وإنشاء وحدة غسيل كلوي بمستشفى بسيون وتوفير حضانات للأطفال حديثى الولادة وغيرها من مشاريع خيرية.