السيسي أعلن 2018 عام "الأشخاص ذوي الإعاقة"

أعلن الرئيس "عبد الفتاح السيسي" سنة 2018، عام الأشخاص ذوي الإعاقة، واستقبل منهم الرياضيين اللي فازو بميداليات وجوايز في البطولات الرياضية العالمية، والأجهزة الفنية اللي تولت تدريبهم، كتفعيل للإعلان ده، وكان الرئيس وافق بعد ما قدم واحد من المشاركين في المؤتمر الوطني للشباب، اقتراح للرئيس بده، وطلب منه إن يكون فيه عام لفئة المعاقين، زي ما كان 2017 هو عام المرأة، و2016 هو عام الشباب.

عدد المعاقين في مصر بيتراوح من 11 ل 14 مليون معاق، ووجود عام للمعاقين ده اعتراف من الدولة بحقوقهم كمواطنين مصريين من حقهم التعايش الطبيعي في المجتمع مع إعاقتهم، وبيزود الوعي للمجتمع تجاه التعامل مع شريحة المعاقين، وفرصة لزيادة فرص دمجهم في المجتمع، وحل مشاكلهم، وتدعيمهم عشان يحققوا إنجازات أكتر.