خريج تجارة انتحل صفة دكتور في مستشفى في الدقهلية لمدة 26 يوم

مارس خريج تجارة، أو الدكتور "شمس" زي ما عرَّف نفسه، الطب لمدة 26 يوم في مستشفى دكرنس في الدقهلية قبل ما يكتشفوا إنه مش دكتور. الموضوع بدأ لمَّا دخل الشاب لقسم الطوارئ في استقبال المستشفى وعرَّف نفسه للدكاترة بإنه طالب في السنة السادسة في كلية الطب، وطلب يشتغل معاهم تحت التدريب.

وفعلًا بدأ "شمس"، عامل في قاعة أفراح واسمه الحقيقي "محمود"، التدريب والشغل فى المستشفى من غير ما حد يسأله عن هويته أو أي مستند يثبت بيه إنه طالب طب، أو مستند يثبت ما يقول. واتمكن "شمس" من إنشاء علاقات وصداقات مع عدد من الدكاترة وأفراد الأمن، واشتغل 26 يوم، صرف فيهم أدوية لمرضى وخيَّط جروحهم.

الموضوع اتكشف لمَّا خيّط لقريبة دكتور في قسم الجراحة إيديها، وبعد ما شاف الخياطة قريبها استغرب من شكلها، وسألها مين اللي خيط كده؟ ولمَّا عرف وراح يكلم "شمس" اكتشف انه مش دكتور، خاصةً لما رفض يظهر هويته أو كارنيه كلية الطب.

فورًا سلِّموه الدكاترة لنقطة الشرطة المتواجدة فى المستشفى، وتم تحرير محضر بالواقعة رقم3403/ 2018 جنح، وهيتعرض على النيابة العامة للتحقيق معاه.

مدير المستشفى، الدكتور "علاء الدين محمد"، علَّق على الموضوع وأكد إن "محمود" ماكانش معاه ما يثبت إنه دكتور.