مدرس ثانوي في سينا بيشرح المنهج للطلبة على واتساب بسبب تعليق الدراسة

محافظة شمال سيناء بتشهد حاليًا عملية شاملة بيقوم بيها الجيش المصري، ضد المجموعات الإرهابية. العملية دي تسببت في تأجيل الدراسة، علشان سلامة الطلاب والمعلمين. الفترة التأجيل دي ممكن تكون مضرة شوية لطلبة ثانوية عامة، اللي لازم يواصلوا المذاكرة لغاية ما لدراسة ترجع علشان ميتأثروش. ده كان السبب اللي خلى أحمد مرتضى، مدرس مادة القانون للثانوي التجاري بالمحافظة، يقرر يعمل جروب واتساب كبير ويحط فيه الطلبة، ويشرحلهم ويذاكر معاهم باستخدام التسجيلات الصوتية على واتساب.

المدرس أعلن من خلال بوست على صفحته على فيسبوك، إنه هيسجل المنهج كامل بصوته عن طرايق واتساب، وهيعمل جروب كبير يضم فيه كل الطلبة، علشان الجدول الزمني اللي عمله لطلبة 3 ثانوي مايتأثرش بتعليق الدراسة. كل اللي على الطالب إنه يبعت رسالة على واتساب لمرتضى ويطلب منه يضيفه للجروب، وكل يوم على الجروب هيشرح بصوته جزء من المنهج.

حسب اللي قاله "مرتضى" للـ "الوطن"، الجروب حاليا فيه عشرات الطلاب من الثانوي التجاري شعبة قانون، بيشرحلهم على الجروب وبيخصص جزء من اليوم لأسئلة الطلبة في المادة، وفي جروب للطلبة الولاد وجروب للطلبة البنات علشان الخصوصية.