أول مذيعة محجبة تقدم نشرة الأخبار على قناة أمريكية

الأمريكية طاهرة رحمن، هي أول مذيعة محجبة تقدم النشرة الإخبارية على قناة أمريكية، تحديدًا محطة "دبليو إتش بي إف" التابعة لشبكة "سي بي إس" الإخبارية، وبدأت بالتحديد يوم 8 فبراير اللي فات. طاهرة بدأت شغلها في المجال الصحفي من سنتين، ورغم الصعوبات اللي واجهتها، قدمت على وظيفة أكبر، علشان تكون أول مذيعة نشرة محجبة في القناة وفي تلفزيونات أمريكا كلها.

موقع "مصراوي" نقل عنها كلامها في برنامج "توداي" اللي قالت فيه إنها جالها رسايل ترحيب كتير وتشجيع من أماكن مختلفة في أمريكا وأوروبا، في نفس الوقت جاتلها رسايل تانية فيها كراهية وتهديدات، لكن "مايك ميكل" مدير الأخبار في القناة، أكد إن المحطة بتجيلها ردود أفعال إيجابية أكتر بكتير من السلبية، وأكد إن اختيار طاهرة كان نتيجة استحقاقها مش لأي سبب تاني.

طاهرة بتتمنى إن ظهورها كمذيعة محجبة، يساهم في تصحيح أي مفاهبم غلط عن الستات المحجبات، وإن الحجاب في حد ذاته مش قمع للمرأة، لكن لازم تكون لابساه عن قناعة، والست اللي تختار تتحجب بإرادتها مش متطرفة.

الصور من موقع "مصراوي"