عقوبة استخدام الدرون بدون تصريح هتوصل لـ٧ سنين سجن و٥٠ ألف جنيه غرامة

مجلس النواب وافق على مشروع قانون بينظم تصنيع وحيازة وتداول الطيارات اللي بدون طيار (الدرون)، القانون عرّف الطائرات دي باعتبارها أي جسم ممكن يطير بدون طيار، عن طريق استخدام أي نوع من أنواع التقنيات، بصرف النظر عن شكله أو حجمه، وأضاف القانون، إن الطائرة المحركة آليا أو لاسلكيا، هي الجسم اللي يمكن تحميله بأي أحمال إضافية، سواء كانت معدات أو أجهزة أو أنظمة تسليح أو ذخائر أو مفرقعات أو غيرها، ويتم التحكم فيه عن بعد، مما يمثل خطر على الأمن القومي.

القانون بيمنع على المؤسسات والشركات والأشخاص، استيراد أو تصنيع أو تداول أو حيازة النوع ده من الطائرات، من غير تصريح من وزارة الدفاع، واللي يخالف القانون هيتفرض عليه عقوبات سجن، تبتدي من سنة وماتزدش عن ٧ سنين، أو غرامة مش أقل من ٥ آلاف جنيه وماتزدش عن ٥٠ ألف جنيه، أو بعقوبة من الاتنين، والعقوبة تتضاعف في حالة تكرار المخالفة.