قيمة الأدوية منتهية الصلاحية في مصر 700 مليون جنيه

نقابة الصيادلة طالبت وزارة الصحة بـ سحب الأدوية منتهية الصلاحية من السوق، حرصًا على صحة المواطنين ومصالح الصيادلة، وأكدت إن قيمة الأدوية المنتهية الصلاحية في الأماكن غير المرخصة، زي العيادات ومحلات المستلزمات الطبية وعن طريق مواقع التواصل الاجتماعي، وصل لـ 700 مليون جنيه، وخاصة إن شركات الإنتاج والتوزيع بترفض استرداد الأدوية منتهية الصلاحية، رغم القرار اللي أصدرته وزارة الصحة، بتطالب فيه شركات إنتاج وتوزيع الأدوية باسترداد أي أدوية منتهية الصلاحية.

الدكتورعصام عبد الحميد وكيل نقابة الصيادلة، قال إن فيه كتير من العيادات ومحلات المستلزمات الطبية غير المرخصة، بتبيع أدوية منتهية الصلاحية، وده منتشر بشكل كبير في المناطق الريفية، وعادي هناك إنهم يبيعوا أدوية من مصادر مجهولة وده بيأثر على المريض.
وأكد "عبد الحميد" على فكرة إن الدكتور مش من حقه بيع الدواء، نظرًا لعدم خبرته في الأدوية، وإن ده من اختصاصات الصيدلي. وحسب "عبد الحميد"، النقابة بتعمل قوائم بالأماكن غير المرخصة لبيع الأدوية، عشان وزارة الصحة تعمل حملات للتفتيش عليها.